الْحَقْ تْشَقْ والباطل زهق
إلا الْحَقْ تْشَقْ
وَخْرَجْ مَنُّو احْبَقْ
يْدُوَّرْ عْلَى مَنْ سْبَقْ
بْغَى يَلْحَقْ وْيَعْتَقْ
كُلْ مَنْ غْرَقْ
فْوَادْ الْمَحْقْ
وْدَرْبْ السُّحْقْ
لَكِنْ الْحَقْ بْقَى مْعَلَّقْ
بِينْ غَرْبْ وْشَرْقْ
وْ تْخَرْبَقْ
فَزْمَانْ الْحُمْقْ
وَارْيَاحْ العُقْ
بْلَعْ رِيقُو وَشْرَقْ
تْأَوَّهْ وَنْطَقْ
وَاعْرَفْ الْفَرْقْ
بِينْ الَفْضَاضَةْ وَالذَّوْقْ
طيبْ انْفَاسُو وَافْرَقْ
قلل انْعَاسُو وَاطْلَقْ
صَلَّى صَامْ وْصَدَّقْ
جْبَدْ قْلَمْ وْوَتَقْ
وَابْدَا يْصِيحْ أَناَ الْحَقْ أَناَ آلْحَقْ
تمآلْبَاطَلْ ازْهَقْ
وخْرَجْ مَنُّو فْتَقْ
امْقِيتْ وَزْرَقْ
ابْزَقْ فْشُونُو ا لَحْمَقْ
طَوَّقْ نَاسُوا وَاتْشَقْ
زَوَّقْ اضْرَاسُو وَلْصَقْ
اصْرَطْ خُبْزْ وَمْرَقْ
وْقَالْ الْبَقْ مَا يَزْهَقْ
وَخَّا يْكُونْ نْزَقْ
اوْبْقَى مْبَحْلَقْ
لاَ حْلاَوَةْ لاَ ذَوْقْ
مَا بَاغِي صَدْقْ
نَاضْ المْصَرْفَقْ
وَاسْرَقْ الْحَقْ
إِوَا شْكُونْ بْغِيتِي يَسْبَقْ
الْبَاطَلْ أَوْ الْحَقْ
فَزمان شُوفْ وَاسْكُتْ
وْتيِقْ بَالسْكُبِّي وَالزَّعْتْ
وَاسْمَعْ وَاصْرَطْ
وْعَنْدَاكْ تَفْلَطْ
وَلاَّ تَغْلَطْ
وَلاَّ تَدَّاعَى بَالزَّلْطْ
إِلَى ابْغِيتِي تَنْجَى
وْتْكَمَّلْ الرْجَى
خَصْ تْكُونْ نَعْجَة
وتخَلِّي للَرِّيقْ فَلْجَة
وْتِيقْ بْالَحْجَا
وْبَرْجَلْ عَرْجَةْ
تَطْلَعْ دَرْجَة
وَخَّا تْكُونْ عَوْجَة
حْكَمْ عْلِيكْ الزْمَانْ
تْكُونْ طْرَجْمَانْ
يا فلان
وَلاَّ عَمْرَكْ تْبَانْ
بِينْ شِي قُومَانْ
انْتَ بَاللُّقْمَة لَلْفُمْ
وْهُمَا بَالْعُودْ لْلَعْيَانْ
وخا يكون ولد العم
غِي تْحَرَّكْ اللْسَانْ
تَصْبَحْ نَدْمَانْ
زَعْمَا رَاكْ إِنْسَانْ
وْحَقَّكْ مَضْمُونْ
وْرَزْقَكْ مَصْيُونْ
مَاشِي فْبْطُونْ
دُوكْ الْحِيتَانْ
وَلاَّ فَظْنُونْ
الْهَمْ وْالأَحْزَانْ
إِوَا فْهَمْنِي وْلاَ تَعْطِينِيشْ
وَاشْ تَمْشِي وْلاَ ماَ تَمشِيشْ
وَتْخَلِّي اخَيَّكْ يْعِيشْ
وْيَبْقَى مْرَبِّي الرِّيشْ
مَنْ زْوَالَغْ الدْرَاوِيشْ
رَا هَذاَ قْسِيمْ بَنْ الذْغَلْ
اعْطَانِي الحْلاَسْ واخْدَا الَبْغَلْ
الله امُولاَيْ اشْنُو نَعْمَلْ
باَشْ انْجَا وهُو يَحْصَلْ
أَناَ مَا ابْقَى فِياَ الَعْقَلْ
اللِّي يَصْبَرْ لْهَاذْ الربَلْ
بقلم ادريس لحمر
